ཕྱི་ལོ་༢༠༢༦ཟླ་༥ཚེས་༡༩ཉིན། ༡༠༨ཞི་བདེ་ལྟེ་གནས་དང་རྡོ་རྗེ་གླིང་Southfield College ཉམས་ཞིབ་སྡེ་ཚན་གཉིས་མཉམ་འབྲེལ་གྱིས་༧ཏཱ་ལའི་བླ་མའི་ཡང་སྲིད་དང་ཁོང་གི་མཛས་རྗེས་སྐོར་གྱི་བརྗོད་གཞིའི་ཐོག མཁས་པའི་གསུང་བཤད་ལས་རིམ་ཞིག་གོ་སྒྲིག་ཞུས། ལས་རིམ་དེའི་ཐོག་ཆེད་དུ་སྲིད་ཟུར་འབུམ་རམས་པ་མཁས་དབང་བློ་བཟང་སེང་གེ་མཆོག་གདན་ཞུས་གནང་ཡོད།
བློ་བཟང་སེང་གེ་མཆོག་གིས་ཁོང་དེ་སྔ་བླ་མ་ཧ་ཊ་ཞེས་པའི་བོད་གཞིས་ཆུང་ཆུང་ཞིག་ལ་སྐྱེས་ཤིང་འཚར་ལོངས་བྱུང་པ་དང་། དེ་ནས་ཕ་མ་གཉིས་ཀྱིས་དཀའ་ལས་བརྒྱབ་ནས་སོ་སོ་རྡོ་རྗེ་གླིང་གི་སློབ་གྲྭར་བཏང། དེའི་རྗེས་སོ་སོའི་སློབ་སྦྱོང་ཧུར་ཐག་བྱས་འབྲས་སུ། རིམ་པས་མཐོ་སློབ་འགྲིམས་པ་དང་དེ་ནས་ཧྭ་ཝ་མཐོ་སློབ་ལ་སློབ་སྦྱོང་བྱས། དེའི་རྗེས་ཕྱི་ལོ་༢༠༡༡ནས་༢༠༢༡བར་བོད་ཀྱི་སྲིད་སྐྱོང་གི་ཕྱག་ལས་ལོ་བཅུ་གནང་ཡོད་པ་དང་། ད་ལྟའི་ཆར་ཧྭ་ཝ་མཐོ་སློབ་ཀྱི་དགེ་རྒན་གནང་པའི་ལམ་བུའི་བརྒྱུད་རིམ་སྐོར་འགྲེལ་བརྗོད་གནང་།
བློ་བཟང་སེང་གེ་མཆོག་གིས། ད་ལྟའི་ཆར་འཛམ་གླིང་ནང་འགྱུར་བ་ཆེན་པོ་ཞིག་འགྲོ་བཞིན་ཡོད་པའི་དུས་མཚུངས། རྒྱ་ནག་དང་རྒྱ་གར་གཉིས་ཀྱི་དབར་ལའང་འགྱུར་བ་མང་པོ་འགྲོ་བཞིན་ཡོད་པ་རེད། རྒྱ་ནག་ལ་མཚོན་ན། ཁོང་ཚོས་སོ་སོའི་སྟོབས་ཤུགས་དང་ས་ཁྱོན་རྒྱ་བསྐྱེད་གཏོང་ཆེད། དམིགས་ཡུལ་མང་པོ་བཟུང་གི་ཡོད་ལ། དམིགས་ཡུལ་དེ་དག་འགྲུབ་ཆེད་འགྲོ་སོང་མང་པོ་གཏོང་གི་ཡོད། ལས་འགུལ་མང་པོ་བརྩམས་དང་རྩོམ་མུས་རེད། གནས་སྟངས་འདི་ལྟ་བུའི་སྐབས་སུ། རྒྱ་གར་གྱི་ཉམས་ཞིབ་པ་རྣམས་ཀྱིས་ངེས་པར་ཏུ་རྒྱ་ནག་གིས་རྒྱ་གར་ལ་བརྐྱངས་བའི་ངན་ཇུས་དེ་དག་སྐོར་ཉམས་ཞིབ་བྱེད་རྒྱུ་ཧ་ཅང་གལ་ཆེ་པོ་ཡིན་སྐོར་གསུངས།
དེ་ནས་ཁོང་གིས་མུ་མཐུད། ད་ཆར་རྒྱ་ནག་གཞུང་ནི་ཉིན་རེ་ནས་ཉིན་རེར་སྟོབས་ཤུགས་ཆེ་རུ་འགྲོ་གི་ཡོད་པ་དང་། ང་ཚོའི་འཐབ་རྩོད་དེའང་ཉིན་རེ་ནས་ཉིན་རེར་དཀའ་ཁ་ཆེ་རུ་འགྲོ་གི་ཡོད། རྒྱུ་མཚན་དེའི་དབང་གིས་ང་ཚོ་བོད་མི་ཡོད་དོ་ཅོག་གིས་དེ་སྔ་ལས་ལྷག་བོད་དོན་འཐབ་རྩོད་ལ་ཤུགས་བསྣོན་བརྒྱབ་དགོས་ཀྱི་ཡོད་སྐོར་དང་། ད་ཆར་རྒྱ་ནག་གཞུང་གིས་༧གོང་ས་སྐྱབས་མགོན་ཆེན་པོ་མཆོག་ཡང་སྲིད་གནས་དོན་ཐད་ལའང་ལག་པར་བསྐྱངས་ནས། མ་འོངས་པར་ཁོང་ཚོས་༧གོང་ས་སྐྱབས་མགོན་ཆེན་པོ་མཆོག་སྐུ་ཕྲེང་རིམ་བྱོན་སྟངས་འཛིན་བྱེད་དགོས་བསམ་པའི་བསམ་ངན་བསྐྱངས་བཞིན་པའི་སྐབས། ང་ཚོས་ངེས་པར་ཏུ་འཛམ་གླིང་རྒྱལ་ཁབ་དང་དཔོན་རིགས་ཁག་ལ་གོ་རྟོགས་གང་ཡོང་སྤེལ་ནས་དགའ་ལྡན་ཕོ་བྲང་ལ་རྒྱབ་སྐྱོར་བྱེད་དགོས་པའི་ལས་གཞི་རྒྱ་ཆེར་གཏོང་དགོས་གལ་ཡིན་སྐོར་དང་། ༧གོང་ས་མཆོག་གི་ཡང་སྲིད་གནས་དོན་འདི་ནི་བོད་པའི་གནས་དོན་ཙམ་མིན་པར། འདི་ནི་རྒྱ་ནག་གཞུང་གིས་མ་འོངས་པར་རྒྱ་གར་གྱི་ཆ་ཁྱོན་ལ་དྭགས་དང་ཨ་རི་ན་ཅལ་།ད་དུང་ཧི་མ་ལ་ཡའི་རི་རྒྱུད་ཀྱི་ནང་པའི་ས་ཁུལ་ཁག་བཙན་བཟུང་བྱེད་པའི་དམིགས་ཡུལ་འགྲུབ་ཆེད་ཀྱང་ཡིན་པས།དེའི་ཐད་རྒྱ་གར་གཞུང་དམངས་གཉིས་ནས་དགའ་ལྡན་ཕོ་བྲང་དང་བོད་མིའི་སྒྲིག་འཛུགས་ཀྱི་ལམ་ཕྱོགས་ལ་རྒྱབ་སྐྱོར་བྱེད་དགོས་གལ་སྐོར་ཡང་གསུངས།
མཐར་སྡེ་ཚན་ངོས་ནས་མཁས་དབང་བློ་བཟང་སེང་གེ་མཆོག་ལ་དྲན་རྟེན་གྱི་ལག་བསྟར་དང་ཆེ་བསྟོད་ཀྱི་གཟེངས་རྟགས་ཕུལ་ནས་ལས་རིམ་རྒྱལ་ཁ་ངང་མཇུག་སྒྲིལ།