གྲོས་མོལ།

འདི་ནི་བརྒྱུད་རིམ་དལ་པོའི་བཙན་འཛུལ་ཞིག་རེད། བོད་ཕྱོགས་ནས་ཨིན་དམག་རྣམས་ལྷ་ས་དང་ཐག་ཉེ་རུ་མ་ཡོང་ཆེད། དུས་ཚོད་འགོར་འགྱངས་ཡོང་བའི་ཐབས་ཇུས་བཀོལ་ཞིང་། སྐབས་འགར་ཨིན་ཇིས་བོད་གཞུང་གི་སྐུ་ཚབ་ལྷན་དུ་གྲོས་མོལ་ཆེད་ཟླ་གྲངས་མང་པོ་སྒུག་དགོས་འཁེལ་གྱི་ཡོད། ཡུན་རིང་ངང་སྒུག་བྱེད་དགོས་བྱུང་བ་དེས་ཨིན་ཇིའི་དམག་མི་ཚོར་ལུས་རྩལ་སྦྱོང་བརྡར་རམ། ཡང་ན་ཁོང་ཚོའི་འགྲེམས་སྟོན་ནང་གསོག་འཇོག་དང་ཉར་ཚགས་ཡོང་ཆེད། བོད་ཀྱི་རྩི་ཤིང་སྣ་ཚོགས་བསྡུ་རུབ་བྱེད་རྒྱུ་དང་། རི་དྭགས་རྔོན་རྒྱུ། དེ་བཞིན་རི་འཛེགས་དང་རི་གཤོངས་སོགས་སུ་འཚོལ་ཉུལ་བྱེད་རྒྱུའི་དུས་ཚོད་དང་གོ་སྐབས་ཀྱང་བསྐྲུན་ཡོད་ལ། དུས་མཚུངས་སུ་ཁོང་ཚོར་ད་དུང་པར་རིས་མང་པོ་ལེན་རྒྱུའི་དུས་ཚོད་ཀྱང་ཕོན་ཆེན་བསྐྲུན་ཡོད།

རྒྱལ་རྩེ་རུ་དམག་འཐབ་བྱས་རྗེས་ཨིན་ཇིའི་དམག་དཔུང་ལྷ་སར་ཐག་ཇེ་ཉེ་དང་ཇེ་ཉེ་རུ་གྱུར། པར་རིས་འདི་ནི་ཕྱི་ཟླ་ ༠༧ ཚེས་ ༡༩ ཉིན་བླངས་པ་ཞིག་ཡིན་ཞིང་། དེའི་ནང་ས་གནས་སྣ་དཀར་རྩེ་རུ་ཨིན་ཇིའི་དམག་དཔོན་ཀཱ་ནལ་ ཡཱང་ཧ་སི་བན་གྱི་སྡོད་གུར་ནང་དུ། བོད་ཀྱི་སྐུ་ཚབ་གཡུ་ཐོག་ཞབས་པད་དང་ཏཱ་བླ་མ་གཉིས་ནས་ཨིན་དམག་ལྷ་སའི་ཕྱོགས་སུ་བཙན་འཛུལ་མ་བྱས་པར་བཀག་འགོག་བྱེད་ཆེད་གྲོས་མོལ་བྱེད་བཞིན་པའི་པར་རིས་ཤིག་རེད།

ཨིན་ཇིའི་གཞུང་འབྲེལ་པར་པ་ཇོན་ ཁི་ལོ་ཌི་ ཝེ་ཊི་ཡིས་ཨིན་དམག་བོད་ལ་འཛུལ་སྐབས་སུ་བླངས་པའི་པར་རིས་ཁྲོད་ནས་གྲགས་ཅན་ཁ་ཤས་ཤིག་ནི། ཕྱི་ལོ་ ༡༩༠༣ ལོར་གམ་པ་རྫོང་དུ་བོད་གཞུང་གི་སྐུ་ཚབ་རྣམས་སྒུག་བཞིན་པའི་སྐབས་སུ་བླངས་པའི་པར་རིས་དེ་དག་ཆགས་ཡོད། དེའང་སྐབས་དེར་ཁོང་སྟག་ཚང་བཙུན་དགོན་དུ་བསྐྱོད་ནས་བཙུན་མ་རྣམས་ལ་པར་ལེན་བྱས་ཤིང་། བཙུན་མ་དེ་དག་གིས་བལ་གྱིས་བཟོས་པའི་སྐྲ་ཚབ་གྱོན་ཡོད་པ་རེད། ཕྱོགས་མཚུངས་ཁོང་གིས་བོད་ཀྱི་མཛེས་སྡུག་ལྡན་པའི་ཡུལ་ལྗོངས་ལ་མཐོང་པར་དཀོན་པའི་ཞེང་ག་ཅན་གྱི་པར་རིས་ཀྱང་བླངས་ཡོད།