༢༠༢༦ ལོའི་ཟླ་༩ ཚེས་༡༦ ཉིན། ༡༠༨ཞི་བདེ་ལྟེ་གནས། དང་། ས་ཝི་ཏྲི་བྷ་ཡི་ཕུ་ལེ་པུ་ནེ་གཙུག་ལག་སློབ་ཆེན་(SPPU) གྱི་རྒྱལ་སྲུང་དང་ཐབས་ཇུས་ཞིབ་འཇུག་སྡེ་ཚན། ཌོག་ཊར་བྷི་ཨར་ཨམ་བེད་ཀར་ཞིབ་འཇུག་སྡེ་ཚན། པཱ་ལི་སྐད་ཡིག་དང་ནང་པའི་ཆོས་ལུགས་ཞིབ་འཇུག་སྡེ་ཚན། ཁྲིམས་རིག་སྡེ་ཚན། རྒྱལ་སྤྱིའི་ལྟེ་གནས་བཅས་མཉམ་འབྲེལ་ཐོག “ཏཱ་ལའི་བླ་མའི་ཡང་སྲིད། ས་ཁམས་ཆབ་སྲིད་ཀྱི་དཀའ་རྙོག་དང་། རྒྱ་གར་དང་ཧི་མ་ལ་ཡའི་ས་ཁུལ་གྱི་བདེ་འཇགས་ལ་ཐེབས་སྲིད་པའི་ཤུགས་རྐྱེན།” ཞེས་པའི་བརྗོད་གཞིའི་ཐོག་ཆེད་དོན་གསུང་བཤད་དང་བགྲོ་གླེང་གི་མཛད་སྒོ་ཞིག་གོ་སྒྲིག་ཞུས་ཡོད།
མཛད་སྒོའི་ནང་གསུང་བཤད་པ་གཙོ་བོར་མཁས་དབང་བློ་བཟང་སེང་གེ་མཆོག་དང་། པདྨ་ཤྲཱི་གཟེངས་རྟགས་བཞེས་མཁན་དགེ་བཤེས་ངག་དབང་བསམ་གཏན་མཆོག་གཉིས་གདན་ཞུ་བྱས་ཡོད་པ་དང་། རྒྱལ་སྲུང་དང་ཐབས་ཇུས་ཞིབ་འཇུག་སྡེ་ཚན་གྱི་དབུ་འཛིན་དང་དགེ་རྒན་ཆེན་མོ་ཌོག་ཊར་ཝི་ཇེ་ཁ་རེ་མཆོག་གིས་བགྲོ་གླེང་གི་འདུ་འཛིན་གནང་ཡོད།
མཛད་སྒོ་དེ་གཙུག་ལག་སློབ་ཆེན་གྱི་གླུ་གཞས་འབུལ་བ་དང་། མར་མེ་སྦར་བའི་ཆོ་ག གསུང་བཤད་པ་རྣམ་པ་དང་༡༠༨ཞི་བདེ་ལྟེ་གནས། ཀྱི་སྐུ་ཚབ་རྣམ་པར་ཆེ་བསྟོད་དང་མཚན་བསྟོད་ཞུ་བ་བཅས་ཀྱིས་དབུ་འཛུགས་གནང་ཡོད།
མཛད་སྒོའི་འགོ་འཛུགས་གསུང་བཤད་ནང་། ཌོག་ཊར་ཝི་ཇེ་ཁ་རེ་མཆོག་གིས་ས་ཝི་ཏྲི་བྷ་ཡི་ཕུ་ལེ་པུ་ནེ་གཙུག་ལག་སློབ་ཆེན་གྱི་རྒྱལ་སྤྱིའི་གནས་བབ་དང་སློབ་མའི་གྲངས་འབོར་ཆེན་པོའི་སྐོར་གསུངས། ཁོང་གིས་ཏཱ་ལའི་བླ་མའི་ཡང་སྲིད་ཀྱི་གནད་དོན་དེ་ཆབ་སྲིད་སྐྱབས་བཅོལ་གྱི་གནད་དོན་ཙམ་ལས་བརྒལ་ཏེ་གོ་རྟོགས་བྱེད་དགོས་པའི་གལ་གནད་ནན་བཤད་གནང་། རྒྱ་ནག་གིས་གནད་དོན་འདིར་དོ་སྣང་བྱེད་པ་ནི་ས་ཁམས་ཆབ་སྲིད་དང་ས་ཁམས་དཔལ་འབྱོར་གྱི་ཁྱབ་ཁོངས་ཆེ་བ་ཞིག་དང་འབྲེལ་བ་ཡོད་པའང་གསུངས།
དགེ་བཤེས་ངག་དབང་བསམ་གཏན་མཆོག་གིས་ནང་ཆོས་ཀྱི་ལྟ་གྲུབ་ཐོག་ནས་སྐྱེ་བ་ཡང་སྲིད་ཀྱི་གོ་དོན་གསལ་བཤད་གནང་བ།
པདྨ་ཤྲཱི་གཟེངས་རྟགས་བཞེས་མཁན་དགེ་བཤེས་ངག་དབང་བསམ་གཏན་མཆོག་གིས་ཡང་སྲིད་ངོས་འཛིན་བྱེད་པ་ནི་ཕྲུ་གུ་འགའ་ཤས་ཀྱི་ཁྲོད་ནས་ཕྲུ་གུ་གཅིག་འདེམས་སྒྲུག་བྱེད་པ་ཙམ་མིན་པ་གསུངས། ཁོང་གིས་དེ་ནི་ནང་པའི་སེམས་ཀྱི་ངོ་བོ་དང་རྒྱུན་མཐུད་ཀྱི་གོ་རྟོགས་ལ་རྩ་བ་བརྟེན་པའི་ལམ་ལུགས་ཁྱད་པར་ཅན་ཞིག་ཡིན་པ་གསལ་བཤད་གནང་། ཐེག་པ་ཆེན་པོའི་ནང་པའི་ལྟ་གྲུབ་ལྟར་ན། སེམས་ཅན་རྣམས་ལས་ཀྱི་དབང་གིས་ཚེ་རབས་གཅིག་ནས་གཞན་དང་། འགྲོ་བའི་རིགས་གཅིག་ནས་གཞན་དུ་འཁོར་བར་འཁྱམས་བཞིན་ཡོད་ཀྱང་། རྣམ་ཤེས་ཀྱི་རྒྱུན་མཐུད་དུ་གནས་པ་ཡིན་པ་གསུངས།
སྐུ་ཕྲེང་བཅུ་བཞི་པའི་ཏཱ་ལའི་བླ་མ་ངོས་འཛིན་གནང་ཚུལ་གླེང་སྐབས། དགེ་བཤེས་ངག་དབང་བསམ་གཏན་མཆོག་གིས་ཡང་སྲིད་འཚོལ་ཞིབ་ཚོགས་ཆུང་གི་ཚོགས་མི་རྣམས་མི་ཕལ་པའི་ཆས་སུ་བརྫུས་ཏེ་སྐུ་ན་ཕྲ་བའི་ཕྲུ་གུ་དེར་མཇལ་བར་ཕེབས་ཚུལ་དྲན་གསོ་གནང་། ཁོང་གི་གསུང་ལྟར་ན། ཕྲུ་གུ་དེས་སྔོན་ཆད་མཇལ་མ་མྱོང་བའི་ཚོགས་མི་རྣམས་ཀྱི་མཚན་ནས་ངོས་འཛིན་གནང་བ་མ་ཟད། སྐུ་ཕྲེང་བཅུ་གསུམ་པའི་ཏཱ་ལའི་བླ་མའི་སྐུ་རྫས་ཁག་ཀྱང་ངོས་འཛིན་གནང་ཡོད་པ་གསུངས། ཁོང་གིས་དེ་དག་ནི་སྲོལ་རྒྱུན་ལྟར་ཡང་སྲིད་ངོས་འཛིན་བྱེད་སྐབས་བེད་སྤྱོད་བྱེད་པའི་མངོན་སུམ་གྱི་ཉམས་མྱོང་ལ་གཞི་བཅོལ་བའི་དཔང་རྟགས་ཀྱི་ཆ་ཤས་ཤིག་ཡིན་པ་གསུངས།
དགེ་བཤེས་ངག་དབང་བསམ་གཏན་མཆོག་གིས་ནང་པའི་སེམས་ཀྱི་ཚན་རིག་སྐོར་རྒྱས་པར་གསལ་བཤད་གནང་སྟེ། རྣམ་ཤེས་ནི་འོས་འཚམས་ཀྱི་རྒྱུ་དང་རྐྱེན་ལ་བརྟེན་ནས་འབྱུང་བ་དང་། རྣམ་ཤེས་ལ་ཕྲ་བ་དང་། འབྲིང་བ། རགས་པ་བཅས་ཀྱི་རིམ་པ་ཡོད་པ་གསུངས། ཁོང་གིས་ནཱ་ལེནྡྲའི་རིག་གཞུང་གི་སྲོལ་རྒྱུན་ལ་གཞི་བཅོལ་ཏེ། སེམས་བྱུང་དང་། ཤེས་ཚོར། སྤྱོད་ལམ། ཉོན་མོངས་པའི་བསམ་ཚུལ་ངན་པ་ཚོད་འཛིན་བྱེད་ཐབས་བཅས་ཀྱི་སྐོར་གསུངས།
ཁོང་གིས་དེང་རབས་ཚན་རིག་གིས་གཙོ་བོ་དངོས་པོའི་སྣང་ཚུལ་ལ་ཚད་འཇལ་བྱེད་ཀྱང་། དེང་སང་ཀླད་པའི་དབང་རྩའི་ཚན་རིག་གི་ཞིབ་འཇུག་ནང་། ནང་པའི་རིག་གཞུང་གིས་དུས་རབས་མང་པོའི་རིང་ཞིབ་འཇུག་བྱས་པའི་རྣམ་ཤེས་ཀྱི་གནད་དོན་ཁག་ལ་དོ་སྣང་ཇེ་ཆེར་གཏོང་བཞིན་ཡོད་པའང་གསུངས།
ཁོང་གིས་སྐྱེ་བ་ཡང་སྲིད་ནི་སེམས་ཀྱི་རྒྱུན་མཐུད་པ་ལས་འབྱུང་བ་ཡིན་པས། ནང་པའི་ལྟ་གྲུབ་ནང་དེ་ནི་ཡིད་ཆེས་ཙམ་གྱི་གནད་དོན་མིན་པར་དངོས་སུ་འབྱུང་བའི་ཆོས་ཉིད་ཅིག་ཏུ་ངོས་འཛིན་བྱེད་པའི་དགོངས་ཚུལ་གསུངས། དུས་འཁོར་རྒྱུད་སོགས་ནང་པའི་གསུང་རབ་ལ་གཞི་བཅོལ་ཏེ། སེམས་ཕྲ་མོའི་རྒྱུན་མཐུད་ཚུལ་གྱི་སྐོར་ཡང་གསལ་བཤད་གནང་།
དགེ་བཤེས་ངག་དབང་བསམ་གཏན་མཆོག་གིས་རྒྱ་ནག་གིས་ཡང་སྲིད་ཀྱི་གནད་དོན་ལ་ཐེ་ཇུས་བྱེད་པའི་སྐོར་ཡང་གསུངས། ཁོང་གིས་༢༠༠༧ ལོར་རྒྱ་ནག་གིས་“སྤྲུལ་སྐུ་”ངོས་འཛིན་སྐོར་ཁྲིམས་སྒྲིག་བཟོས་པ་དང་། ༢༠༡༡ ལོར་གོང་ས་ཏཱ་ལའི་བླ་མ་མཆོག་གིས་སྐུ་ན་༩༠ ལ་ཕེབས་སྐབས་ཏཱ་ལའི་བླ་མའི་ལམ་ལུགས་ཀྱི་མ་འོངས་པའི་སྐོར་གསལ་བཤད་གནང་རྒྱུ་ཡིན་པའི་གསུང་བཤད་གནང་བ་དྲན་གསོ་གནང་།
ཁོང་གིས་ཧི་མ་ལ་ཡ་དང་ཨེ་ཤེ་ཡའི་ས་ཁུལ་ཁག་གི་ནང་པའི་ཆོས་ཚོགས་རྣམས་ཀྱིས་ཏཱ་ལའི་བླ་མའི་ལམ་ལུགས་མུ་མཐུད་གནས་དགོས་པའི་གསོལ་འདེབས་ཞུས་ཡོད་པ་གསུངས། དེའི་རྗེས་སུ་གོང་ས་མཆོག་གིས་ཏཱ་ལའི་བླ་མའི་ལམ་ལུགས་མུ་མཐུད་གནས་རྒྱུ་ཡིན་པ་དང་། ཁོང་གི་ཡང་སྲིད་ངོས་འཛིན་གྱི་འགན་དབང་ནི་དགའ་ལྡན་ཕོ་བྲང་ཡིད་ཆེས་དགེ་རྩ་ཁོ་ནར་ཡོད་པ་གསལ་བསྒྲགས་གནང་ཡོད་པའང་གསུངས།
མཁས་དབང་བློ་བཟང་སེང་གེ་མཆོག་གིས་ཡང་སྲིད་དང་ས་ཁམས་ཆབ་སྲིད་ཀྱི་འབྲེལ་བའི་སྐོར་གསུང་བཤད་གནང་བ།
མཁས་དབང་བློ་བཟང་སེང་གེ་མཆོག་གིས་སྡེ་ཚན་ཁག་གི་དབུ་འཛིན་རྣམ་པས་མཉམ་འབྲེལ་ཐོག་མཛད་སྒོ་གལ་ཆེན་འདི་གོ་སྒྲིག་གནང་བར་བཀའ་དྲིན་ཆེ་ཞུས་ཏེ། ཏཱ་ལའི་བླ་མའི་ཡང་སྲིད་ཀྱི་གནད་དོན་ལ་ཐད་ཀར་གསུང་བཤད་གནང་། ཁོང་གིས་ཨ་ཝ་ཏཱར་ཞེས་པའི་ལྟ་དོན་ལ་གཞི་བཅོལ་ཏེ། བླ་མ་ཞིག་གིས་སླར་ཡང་སྐྱེ་བ་བཞེས་རྒྱུའི་ཐུགས་ཐག་གཅོད་པ་དང་། སྲོལ་རྒྱུན་དེའི་ནང་སློབ་མ་རྣམས་ཀྱིས་རང་གི་བླ་མ་མུ་མཐུད་ཡང་སྲིད་དུ་ཕེབས་ནས་རང་ཉིད་ལ་ལམ་སྟོན་གནང་རྒྱུའི་གསོལ་འདེབས་ཞུ་བ་ཡིན་པ་གསལ་བཤད་གནང་། ཁོང་གིས་ལོ་༡༤ རིང་གོང་ས་ཏཱ་ལའི་བླ་མ་མཆོག་གི་རྗེས་འཇུག་པ་ཚོས་ཏཱ་ལའི་བླ་མའི་ལམ་ལུགས་དང་སྐུ་ཕྲེང་མུ་མཐུད་གནས་རྒྱུའི་གསོལ་འདེབས་དད་པ་དང་ལྡན་པས་ཞུས་ཡོད་པ་གསུངས།
གོང་ས་ཏཱ་ལའི་བླ་མ་མཆོག་གི་ཕྱག་དེབ་《Voice for the Voiceless》ཞེས་པར་གཞི་བཅོལ་ཏེ། མཁས་དབང་བློ་བཟང་སེང་གེ་མཆོག་གིས་གོང་ས་མཆོག་གི་ཡང་སྲིད་རྒྱ་ནག་གི་ནང་མིན་པར་རྒྱ་ནག་གི་ཕྱི་རོལ་དུ་འཁྲུངས་རྒྱུ་ཡིན་པའི་བཀའ་གསལ་གནང་ཡོད་པ་གསུངས། དེའི་རྒྱུ་མཚན་ནི་ཆོས་ལུགས་ཉམས་ལེན་བྱེད་པར་ཆོས་དད་རང་དབང་དགོས་ངེས་ཡིན་པས་རེད། ཁོང་གིས་རྒྱ་ནག་ནང་ཆོས་དད་རང་དབང་དེ་འདྲ་མེད་པའི་དགོངས་ཚུལ་བཏོན། བོད་ནང་གོང་ས་ཏཱ་ལའི་བླ་མ་མཆོག་གི་སྐུ་པར་ཉར་ཚགས་བྱེད་པ་བཀག་འགོག་ཡོད་པ་དང་། དེར་ཉེས་ཆད་གཅོད་སྲིད་པ། རྒྱ་ནག་དབང་འཛིན་པ་ཚོས་ལོ་ངོ་བཅུ་ཕྲག་མང་པོའི་རིང་གོང་ས་མཆོག་ལ་སྐྱོན་བརྗོད་མུ་མཐུད་བྱས་ཡོད་པའང་གསུངས།
མཁས་དབང་བློ་བཟང་སེང་གེ་མཆོག་གིས་རྒྱ་ནག་གུང་ཁྲན་ཏང་གིས་ཆོས་ལུགས་ལ་ཡིད་ཆེས་མེད་པར་བཤད་ཀྱང་། ཏཱ་ལའི་བླ་མའི་ཡང་སྲིད་འདེམས་སྒྲུག་བྱེད་རྒྱུར་དོ་སྣང་ཅིའི་ཕྱིར་བྱེད་པ་ཡིན་ནམ་ཞེས་དྲི་བ་བཏོན། ཁོང་གིས་ནང་པའི་ཆོས་དད་པ་ཚོས་ཡང་སྲིད་ཀྱི་སྐུ་ཉིད་ལ་དད་པ་བྱེད་ཀྱང་། རྒྱ་ནག་གུང་ཁྲན་ཏང་གིས་ཏཱ་ལའི་བླ་མའི་ལམ་ལུགས་དང་དེའི་ཤུགས་རྐྱེན་ལ་ཚོད་འཛིན་བྱེད་འདོད་ཡོད་པའི་དགོངས་ཚུལ་བཏོན།
ཁོང་གིས་གོང་ས་ཏཱ་ལའི་བླ་མ་མཆོག་གི་ཤུགས་རྐྱེན་ནི་ཧི་མ་ལ་ཡའི་ས་ཁུལ་དང་། བོད། ནང་སོག ཕྱི་སོག བུ་རི་ཡ་ཏི་ཡ། ཏུ་ཝ། ཁལ་མི་ཀི་ཡ་བཅས་རྒྱ་གར་ནས་ཨུ་རུ་སུའི་བར་ཁྱབ་ཡོད་པ་གསུངས། ཁོང་གི་གསུང་ལྟར་ན། ས་ཁུལ་དེ་དག་གི་ནང་པའི་ཆོས་དད་པ་ཚོས་གོང་ས་མཆོག་རང་གི་རྩ་བའི་བླ་མར་ངོས་འཛིན་ཞུ་བཞིན་ཡོད།
མཁས་དབང་བློ་བཟང་སེང་གེ་མཆོག་གིས་རྒྱ་ནག་གི་“མཛུབ་མོ་ལྔའི་ཐབས་ཇུས་”ཞེས་པའི་སྐོར་ཡང་གསུངས། ཐབས་ཇུས་དེའི་ནང་བོད་ནི་ལག་མཐིལ་དང་། བལ་ཡུལ། འབྲུག ཨ་རུ་ན་ཅལ་པྲ་དེ་ཤི། འབྲས་ལྗོངས། ལ་དྭགས་བཅས་ནི་མཛུབ་མོ་ལྔར་མཚོན་པ་ཡིན་པ་གསུངས། ཁོང་གིས་རྒྱ་ནག་གིས་ས་ཁུལ་དེ་དག་ལ་རང་གི་ཤུགས་རྐྱེན་རྒྱ་སྐྱེད་གཏོང་འདོད་ཡོད་པ་དང་། མ་འོངས་པར་པེ་ཅིང་གིས་ཚོད་འཛིན་བྱས་པའི་ཏཱ་ལའི་བླ་མ་ཞིག་བེད་སྤྱད་དེ་ས་ཁུལ་ལྔ་པོ་དེ་རྒྱ་ནག་གི་ཆ་ཤས་ཡིན་པའི་འདོད་ཚུལ་འདོན་སྲིད་པའི་དགོངས་ཚུལ་བཏོན།
ཁོང་གིས་རྒྱ་ནག་གི་“མཛུབ་མོ་བཅུའི་ཐབས་ཇུས་”ཞེས་པའི་རྒྱ་སྐྱེད་སྐོར་ཡང་གསུངས་ཏེ། རྒྱ་གར་གྱི་ཉེ་འཁོར་རྒྱལ་ཁབ་ཁག་སྟེ། པ་ཀི་སི་ཐན་དང་། བྷང་ལ་དེ་ཤི། མལ་དིབས། ཤྲཱི་ལངྐ། ཨབ་གྷ་ནི་སི་ཐན་བཅས་སུ་རྒྱ་ནག་གི་ཐེ་ཇུས་ཇེ་ཆེར་འགྲོ་བཞིན་པ་གསུངས། ཁོང་གིས་རྒྱ་ནག་འཛམ་གླིང་གི་སྟོབས་ཆེན་ཨང་དང་པོར་འགྱུར་འདོད་ཡོད་པའི་འདུན་པ་དེའི་ནང་། རྒྱ་གར་ལྟ་བུའི་འགྲན་ཟླར་འགྱུར་སྲིད་པའི་རྒྱལ་ཁབ་ཁག་ལ་ཚོད་འཛིན་བྱེད་རྒྱུའང་ཚུད་ཡོད་པའི་དགོངས་ཚུལ་བཏོན།
དེ་རྗེས་མཁས་དབང་བློ་བཟང་སེང་གེ་མཆོག་གིས་ཡང་སྲིད་ཀྱི་གནད་དོན་དེ་ཡུག་རེན་དང་། ཝ་ཤིང་ཊོན། ལྡི་ལི་བཅས་ཀྱི་ས་ཁམས་ཆབ་སྲིད་ཀྱི་འཕེལ་རིམ་ཆེ་ཁག་དང་སྦྲེལ་ཏེ་གསུངས། རྒྱ་གར་གྱི་སྲིད་བློན་ན་རེན་དྲ་མོ་དི་དང་རྒྱ་ནག་གི་རྒྱལ་ཁབ་ཀྱི་དབུ་ཁྲིད་ཞི་ཅིན་ཕིང་གཉིས་ཀྱི་མཇལ་འཕྲད་ཁག་ལ་གཞི་བཅོལ་ཏེ། ༢༠༡༤ ལོའི་མོ་དི་དང་ཞི་ཅིན་ཕིང་གི་མཇལ་འཕྲད་དང་། ༢༠༡༧ ལོའི་འབྲོག་ལམ་གྱི་དམག་དོན་འགལ་ཟླ། ༢༠༡༩ ལོར་ཏ་མིལ་ན་ཌུར་གནང་བའི་ཕྱོགས་གཉིས་ཀྱི་དངོས་སུ་མིན་པའི་མཇལ་འཕྲད། ༢༠༢༠ ལོའི་གལ་ཝན་གྱི་དམག་དོན་འཁྲུག་རྩོད་བཅས་ཀྱི་སྐོར་གསུངས། ཁོང་གིས་འབྲོག་ལམ་གྱི་ཐབས་ཇུས་གལ་གནད་དང་། དེ་ནི་སི་ལི་གུ་རི་བར་ཁྱམས་སམ་“བྱ་དེའི་སྐེ་མཇིང་”ཞེས་འབོད་པའི་ས་ཁུལ་དང་ཐག་ཉེ་བར་གནས་ཡོད་པའི་གལ་གནད་ནན་བཤད་གནང་།
ཁོང་གིས་༡༩༡༤ ལོར་བོད་དང་དབྱིན་ཇིའི་དབང་འོག་གི་རྒྱ་གར་བར་བཞག་པའི་སིམ་ལ་ཆིངས་ཡིག་དང་། དེ་དང་འབྲེལ་བའི་མེག་མ་ཧོན་ས་མཚམས་ཐིག་གི་སྐོར་ཡང་གསུངས། ཁོང་གིས་བོད་ཀྱིས་ཨ་རུ་ན་ཅལ་པྲ་དེ་ཤི་དང་རྟ་དབང་ས་ཁུལ་དང་འབྲེལ་བའི་ས་མཚམས་དབྱེ་འབྱེད་ལ་མོས་མཐུན་བྱས་ཡོད་པ་གསུངས། དེ་བཞིན་༡༩༥༤ ལོའི་ཞི་བདེ་མཉམ་གནས་རྩ་དོན་ལྔའི་ཆིངས་ཡིག་དང་། ༡༩༥༩ ལོར་བོད་ནང་བྱུང་བའི་གནས་ཚུལ། ༡༩༦༢ ལོའི་རྒྱ་གར་དང་རྒྱ་ནག་གི་དམག་འཁྲུག ༡༩༦༧ ལོའི་རྣ་ཐོས་ལའི་དམག་དོན་འཁྲུག་རྩོད། ༡༩༧༩ ལོར་ཨ་ཏལ་བྷི་ཧ་རི་ཝཱ་ཇ་པཱ་ཡི་མཆོག་གིས་རྒྱ་ནག་དང་འབྲེལ་བ་སླར་གསོ་བྱེད་ཐབས་གནང་བ་བཅས་ཀྱི་སྐོར་གླེང་གནང་།
མཁས་དབང་བློ་བཟང་སེང་གེ་མཆོག་གིས་བོད་ནི་རང་བྱུང་ཐོན་ཁུངས་ཕྱུག་པོའི་ས་ཁུལ་ཞིག་ཡིན་པ་དང་། “ཨེ་ཤེ་ཡའི་ཆུ་མཛོད་”ཅེས་འབོད་པའི་གལ་གནད་ནན་བཤད་གནང་། བོད་ནས་རྒྱུག་པའི་གཙང་པོ་ཁག་ལ་ཆུ་རྒྱུན་འོག་མའི་མི་གྲངས་དུང་ཕྱུར་མང་པོ་བརྟེན་ཡོད་པ་གསུངས། ཁོང་གིས་རྒྱ་གར་དང་བོད་ཀྱི་བར་འཁྱགས་མཚོ་༧,༩༠༠ ཙམ་ཡོད་པ་གསུངས་ཏེ། གནོད་འཚེ་སྔོན་འགོག་ཆེད་ཁྱིམ་མཚེས་རྒྱལ་ཁབ་ཚོའི་བར་མཉམ་འབྲེལ་ཞིབ་འཇུག་དང་། ཉམས་ཞིབ། གྲངས་ཐོ་མཉམ་སྤྱོད། སྔོན་བརྡའི་མ་ལག་བཅས་གལ་ཆེན་པོ་ཡིན་པའི་དགོངས་ཚུལ་བཏོན།
ཉེ་ཆར་བྱུང་བའི་ཆུ་ལོག་དང་འབྲེལ་ཏེ་རྒྱ་ནག་གི་ཚན་རྩལ་གྱི་ནུས་པ་དང་གནོད་འཚེར་ཡ་ལན་སྤྲོད་ཕྱོགས་ལ་དྲི་བ་བཏོན་སྐབས། ཁོང་གིས་གཏོར་སྐྱོན་གྱི་སྙན་ཐོ་ཁག་དང་། རྩོད་གཞིར་གྱུར་པའི་ཤི་རྨས་ཀྱི་གྲངས་ཐོ་ཁག་ལ་གཞི་བཅོལ་ཏེ། གནས་ཚུལ་གསལ་ཁ་དོད་པོ་དང་རྒྱལ་སྤྱིའི་མཉམ་ལས་དེ་བས་ཆེ་བ་དགོས་པའི་དགོངས་ཚུལ་བཏོན།
ཁོང་གིས་དེ་དང་འབྲེལ་ཏེ་ཏོག་དབྱིབས་གཉན་རིམས་(COVID-19) ཀྱི་གནས་ཚུལ་དཔེར་བཀོད་ནས། གཉན་རིམས་ཀྱི་འབྱུང་ཁུངས་ཞིབ་འཇུག་བྱེད་འདོད་ཡོད་པའི་རྒྱལ་སྤྱིའི་ཞིབ་དཔྱོད་པ་ཚོར་རྒྱ་ནག་ནང་འཛུལ་ཞུགས་ཀྱི་གོ་སྐབས་མ་ཐོབ་པའི་སྐོར་དྲི་བ་བཏོན། དེ་བཞིན་རྒྱ་ནག་གིས་མ་འོངས་པར་ཁྱིམ་མཚེས་རྒྱལ་ཁབ་ཚོར་འཁྱགས་མཚོ་དང་ཆུ་ལོག་གི་ཉེན་ཁའི་སྐོར་མཉམ་འབྲེལ་ཞིབ་འཇུག་བྱེད་དུ་འཇུག་སྲིད་དམ་ཞེས་དྲི་བ་བཏོན།
ཡང་སྲིད་ཀྱི་གནད་དོན་ལ་ཕྱིར་ལོག་སྟེ། མཁས་དབང་བློ་བཟང་སེང་གེ་མཆོག་གིས་པེ་ཅིང་གིས་གནད་དོན་དེར་དོ་སྣང་བྱེད་པའི་རྒྱུ་མཚན་གཙོ་བོ་ནི་ཏཱ་ལའི་བླ་མའི་ཤུགས་རྐྱེན་དང་འབྲེལ་བ་ཡོད་པའི་དགོངས་ཚུལ་བཏོན། ཁོང་གིས་རྒྱ་ནག་གིས་པེ་ཅིང་གི་ལྟ་ཚུལ་ལ་རྒྱབ་སྐྱོར་བྱེད་མཁན་གྱི་ཏཱ་ལའི་བླ་མ་ཞིག་རང་ངོས་ནས་འཛུགས་ཐབས་བྱེད་སྲིད་པའི་དགོངས་ཚུལ་བཏོན།
ཆོས་དད་རང་དབང་གི་ཐད། མཁས་དབང་བློ་བཟང་སེང་གེ་མཆོག་གིས་རྒྱ་ནག་ནང་གནས་སྟངས་ཇེ་སྡུག་ཏུ་འགྲོ་བཞིན་ཡོད་པའི་དགོངས་ཚུལ་བཏོན་ཏེ། དགོན་པ་དང་། ཁ་ཆེའི་མཆོད་ཁང་། ཡེ་ཤུའི་མཆོད་ཁང་བཅས་གཏོར་བཤིག་བྱེད་པའི་སྐོར་གསུངས། དེ་བཞིན་རྒྱ་ནག་དང་ཝ་ཏི་ཀན་གཉིས་ཀྱི་བར་ཡེ་ཤུའི་ཆོས་ལུགས་ཀྱི་བླ་ཆེན་བསྐོ་གཞག་སྐོར་བཞག་པའི་གྲོས་མཐུན་ལ་ཡང་གླེང་གནང་། ཁོང་གིས་ཆོས་ལུགས་ཀྱི་དབུ་ཁྲིད་ཚོས་རྒྱ་ནག་གུང་ཁྲན་ཏང་གི་ཚབ་ཏུ་རྒྱལ་གཅེས་ཀྱི་བསམ་བློ་སྤེལ་དགོས་པའི་རེ་བ་བྱེད་བཞིན་ཡོད་པའི་དགོངས་ཚུལ་བཏོན།
གསུང་བཤད་ཀྱི་མཇུག་ཏུ་མཁས་དབང་བློ་བཟང་སེང་གེ་མཆོག་གིས་རྒྱ་ནག་གིས་ཏཱ་ལའི་བླ་མའི་ཡང་སྲིད་ལ་ཚོད་འཛིན་བྱེད་འདོད་ཅིའི་ཕྱིར་ཡོད་པ་ཡིན་ནམ་ཞེས་ཡང་བསྐྱར་དྲི་བ་བཏོན། ཁོང་གིས་གལ་ཏེ་རྒྱ་ནག་གིས་དངོས་གནས་ཡང་སྲིད་ཀྱི་ལམ་ལུགས་ལ་དོ་སྣང་ཡོད་ན། ཐོག་མར་མའོ་ཙེ་ཏུང་གི་ཡང་སྲིད་ངོས་འཛིན་བྱེད་ཐབས་ལ་བསམ་གཞིག་བྱེད་དགོས་པའི་ཟུར་ཟའི་གསུང་བཤད་གནང་།
ཁོང་གིས་རྒྱ་ནག་ནང་མི་ཚོས་དཀོན་མཆོག་ལ་སྐྱོན་བརྗོད་བྱེད་ཆོག་ཀྱང་། ཞི་ཅིན་ཕིང་ལ་སྐྱོན་བརྗོད་བྱེད་མི་ཆོག་པ་གསུངས། ཁོང་གིས་དེ་ནི་རྒྱ་ནག་གིས་རྒྱ་ནག་གཙོ་བོར་གྱུར་པའི་འཛམ་གླིང་གི་གོ་རིམ་གསར་པ་ཞིག་འཛུགས་ཐབས་བྱེད་པའི་ཆ་ཤས་ཤིག་ཏུ་བརྩི་བཞིན་ཡོད་པའི་དགོངས་ཚུལ་བཏོན། དེ་བཞིན་རྒྱ་གར་གྱིས་བོད་ཀྱི་གནས་བབ་ལ་གོ་རྟོགས་མ་བྱས་ན། རྒྱ་ནག་ལ་གཏན་ནས་གོ་རྟོགས་བྱེད་མི་ཐུབ་པའང་ནན་བཤད་གནང་།
གསུང་བཤད་དང་བགྲོ་གླེང་གི་མཛད་སྒོ་དེར་མི་གྲངས་༡༥༠ ལྷག་ཙམ་ཞུགས་ཡོད་པ་དང་། མཛད་སྒོའི་རིང་གསུང་བཤད་པ་རྣམ་པ་དང་མཉམ་དུ་ཏཱ་ལའི་བླ་མའི་ལམ་ལུགས་ཀྱི་མ་འོངས་པ་དང་། ཐའེ་ཝན་གྱིས་བོད་ཀྱི་གནད་དོན་ལ་འཛིན་པའི་ལངས་ཕྱོགས། རྒྱ་ནག་གི་མི་འབོར་ཉུང་དུ་འགྲོ་བའི་གནས་སྟངས། རྒྱ་ནག་གི་བུ་ལོན་ལ་བརྟེན་པའི་དཔལ་འབྱོར། རྒྱ་གར་གྱི་སྨན་རིག་དེ་མཉེན་པའི་སྟོབས་ཤུགས་ཤིག་ཏུ་བེད་སྤྱོད་བྱེད་ཐབས། དབུ་མའི་ལམ་གྱི་ལྟ་གྲུབ། རྒྱ་གར་གྱི་གཙུག་ལག་སློབ་ཆེན་ཁག་ཏུ་བོད་རིག་པའི་ཞིབ་འཇུག་གི་ལས་རིམ་བཅས་ཀྱི་ཐོག་དོན་སྙིང་ལྡན་པའི་དྲི་ལན་དང་བགྲོ་གླེང་གནང་ཡོད།
